Þurrt auga (KCS)

Hvað er þurrt auga?

Vatnslegi hluti táravökvans er framleiddur í tveimur kirtlum í augnlokunum. Algengasta ástæðan fyrir því að framleiðslan minnkar er að ónæmiskerfi líkamans ræðst á kirtilinn. Framleiðsla fitu- og slímhluta táranna helst þó í lagi, sem skýrir af hverju augun eru oft með mikla slímkennda útferð.

Af hverju eru tárin mikilvæg?

• Hjálpa til við að fá skýrari sjón
• Smyrja augnlokin
• Færa næringu og fjarlægja úrgangsefni
• Koma í veg fyrir sýkingar
• Fjarlægja aðskotahluti af hornhimnunni
• Stjórna sýrustigi í ysta lagi hornhimnunnar

Tegundir í aukinni hættu

Vandamálið er þekktast hjá hundum en getur einnig komið upp hjá köttum.

• Cocker spaniel (amerískur og enskur)
• Cavalier King Charles spaniel
• Miniature schnauzer
• West Highland white terrier
• Bulldog og Boston terrier
• Lhasa apso og Shih tzu
• Yorkshire terrier
• Pekingese og Pug
• Samoyed og blóðhundur

Einkenni

Líflaus augnslímhúð og hornhimna, roði og bólga í slímhúð. Dýrið pírir augun vegna verkja og slím eykst. Ef ástandið er slæmt getur hornhimnan orðið bláleit, æðar farið að vaxa í henni og hún dökknað. Getur komið upp í öðru auganu eða báðum.

Greining

Gerð með einföldu prófi (Schirmer tear test): hvítum strimli er komið fyrir undir augnlokinu í eina mínútu og mælt hve langt tárin ná.

Meðhöndlun

Fyrst þarf að ná niður sýkingu með sýklalyfjum. Síðan er byrjað á augnsmyrsli (cyclosporine) tvisvar á dag og táraframleiðslan mæld aftur eftir 3–4 vikur. Framfarir sjást í um 80% tilfella og þá má oft minnka meðhöndlunina. Gervitár eru notuð samhliða 4–6 sinnum á dag.

Meðhöndlunar er þörf það sem eftir er ævinnar. Daginn sem komið er í endurmælingu má ekki meðhöndla augun með neinum lyfjum eða dropum.